Liputan6.com, Palembang - Siapo yang dak tahu dengan Gunung Rinjani di Provinsi Nusa Tenggara Barat (NTB). Gunung yang masok dalem Seven Summit Indonesia, memang masok dalem jalur pendakian terfavorit pendaki-pendaki di Indonesia.
Gunung merapi tertinggi kedua dengan tingginyo 3.726 Mdpl, ngasih pemandangan alam yang tekinak cantek nian. Apolagi ado Danau Segara Anak yang biso dijingok dari pucuk Gunung Rinjani.
Walau Gunung Rinjani cantek nian, Gunung Dempo di Kota Pagar Alam Sumatera Selatan (Sumsel) dak kalah bagusnyo jugo. Apolagi jalur pendakiannyo yang buat tenago kito tekuras nian, tantangannyo bener-bener nguji nyali kito.
Baca Juga
Advertisement
Saking saronyo jalur pendakian di Gunung Dempo, banyak nian pendaki dari luar Sumsel yang mengas dan nangis pas ndaki Gunung Dempo.
Cak uji Rahmatunnisah (33), warga Makassar NTB. Dio la neman naik Gunung Rinjani, dengan jalur yang berkelok-kelok dan ngabisin tenago nian. Dio naik gunung idaman para pendaki ini, dari taon 2007.
Tapi pas dio denger ado gunung yang jalurnyo bikin pendaki nangis, dio akhernyo tertarik naik Gunung Dempo dengan ketinggian 3.159 Mdpl.
Taon 2013 dulu, dio samo tigo ikok kawannyo dari NTB, langsung nyuboke naik Gunung Dempo direwangi kawan-kawannyo dari Kota Palembang.
“Pas nak naik Gunung Dempo, aku dak dikasitau samo kawan-kawan, cakmano jalurnyo, apo yang ado di sano. Aku kiro masih saro naik Gunung Rinjani, la besak kepala aku pas nak naik. Cak ngecikke itu nah,” katonyo ke Liputan6.com.
Pas liwat pintu rimba, shelter 1 dan 2, dio biaso be mendaki Gunung Dempo. Dio ngeraso jalurnyo masih biso dilalui dengan mudah, walau badannyo la basah lantak keringetan.
Berita tersebut menggunakan Bahasa Palembang, Sumatera Selatan. Penggunaan bahasa daerah ini dalam rangka memperingati Hari Sumpah Pemuda dan perayaan Bulan Bahasa, menghargai keragaman Indonesia.
Jingok Video Ini Jugo Nah:
Tenangis Nak Balek
Tapi pas ngentak ujan turun, dio ngeraso jalur pendakian Gunung Dempo la agak saro. Apolagi pas lewat dinding lemari, jalurnyo licin dan dio sampe tepeleset bekali-kali dengan lumpur yang lengket di badan dio.
“Aku tenangis pas lewat jalur-jalur yang becek tuh, saro nian ternyato naik Gunung Dempo ni. Sempet ilang semangat, nak turun be, dak usah lanjut daki lagi. Mengas nian, tenangis-nangis nian aku,” ujinyo.
Dio sampe hamper pingsan di tengah jalur. Apolagi liat kawan-kawannyo dari NTB, yang jugo mengas di jalur. Tapi untungnyo, kawan-kawannyo tetap ngasih semangat untuk teros lanjut jalan.
Untung be Anis, sapaan akrab dio, sampe ke puncak Gunung Dempo dan puncak Gunung Merapi. Mereka jugo buka tenda di pelataran, dengan udara yang dingin nian. Besoknyo, dio lanjut turun dari Gunung Dempo.
“Kalau turun Gunung Rinjani, palingan kram kaki cak sehari. Tapi men turun Gunung Dempo, lebih dari tigo ari kaki aku keram dan sakit. Pengalaman dak biso aku lupoke nian,” cerito dio.
Advertisement
